មជ្ឈមណ្ឌលពាណិជ្ជកម្មពិភពលោក ទីក្រុងម៉ូស្គូ: នៅល្ងាចថ្ងៃទី០២ ខែកក្កដា ឆ្នាំ២០១៩ ឯកឧត្តម ទេព ងន អនុប្រធានទី២ ព្រឹទ្ធសភា បានដឹកនាំគណៈប្រតិភូសភាកម្ពុជា បន្តចូលរួមសម័យប្រជុំពេញអង្គ លើកទី២ នៃវេទិកាអន្តរជាតិ លើកទី២ ស្តីពីការអភិវឌ្ឍប្រព័ន្ធសភានិយម។ ក្នុងឱកាសនោះឯកឧត្តមប្រធានគណៈប្រតិភូបានឡើងថ្លែងសុន្ទរកថា ផ្តោតសំខាន់លើ៖
– ការឈានទៅរកភាពមិនប្រាកដប្រជា និងមិនអាចព្យាករណ៍របស់ពិភពលោក ដែលគំរាមកំហែងដល់សណ្តាប់ធ្នាប់ និងនិម្មាបនកម្មអន្តរជាតិ ដោយសារតែកើនឡើងនៃនិន្នាការឯកតោភាគី ការគាំពារនិយម សង្គ្រាមពាណិជ្ជកម្ម និងការប្រកួតប្រជែងភូមិសាស្ត្រនយោបាយ
– ការវាយតម្លៃខ្ពស់ចំពោះកិច្ចសហប្រតិបត្តិការអន្តរសភា និងការទូតសភាដែលពិតជាមានសារៈសំខាន់ដល់ដំណើរការរក្សាសន្តិភាព និងសន្តិសុខពិភពលោក
– ការមកដល់នៃបច្ចេកវិទ្យាឌីជីថលក្នុងសម័យបដិវត្តន៍ឧស្សាហកម្ម ៤.០ ដែលបានបង្កើតទាំងកាលានុវត្តភាព និងបញ្ហាប្រឈម ដល់គ្រប់ប្រទេសទាំងអស់ ហើយបច្ចេកវិទ្យាឌីជីថលនេះបាននិងកំពុងបញ្ជ្រៀបយ៉ាងឆាប់រហ័សទៅក្នុងសេដ្ឋកិច្ច នយោបាយ និងពាណិជ្ជកម្មសកល។
